|
(inneholder Stortingsvedtak, lov, forskrifter og Toll- og avgiftsdirektoratets kommentarer.)
Toll- og avgiftsdirektoratets kommentarer:
1. Innleiing
Det skal betalast omregistreringsavgift ved omregistrering av køyretøy som tidlegare har vore registrert i Noreg.
Avgiftsplikta oppstår idet eit tidlegare registrert køyretøy vert omregistrert på ny eigar ved trafikkstasjonen.
Stortingsvedtaket § 1 gir ei uttømande liste over dei køyretøya som skal betale avgift. Avgiftspliktige køyretøy er delt inn i 4 køyretøygrupper og deretter gradert etter vekt og alder.
2. Fastsetjing av avgifta
Avgifta skal fastsetjast på grunnlag av den avgiftsmessige statusen som køyretøyet har på omregistreringstidspunktet, etter definisjonen som er gjeve i køyretøyforskrifta kap. 2 og Finansdepartementet si forskrift om eingongsavgift på motorvogner m.m.
Det skal reknast avgift for ambulanse etter satsane for personbilar.
For gravferdskøyretøy (likvogn) skal det reknast avgift etter satsane for varebilar.
Tvilsspørsmål som melder seg om avgiftsmessig køyretøygruppe, skal takast opp med tollregionen.
Tollregion Oslo og Akershus, heretter kalla tollregionen, administrerer avgifta.
Registreringsår er det året køyretøyet vart registrert første gong her i landet, - eller i utlandet dersom køyretøyet har vore registrert i utlandet før det vart registrert her i landet, som går fram av Statens vegvesens motorvognregister.
Sjå Stortingets vedtak § 1
Eigenvekta som går fram i Statens vegvesens motorvognregister skal vere grunnlaget for avgiftsfastsetjinga.
Lov om betaling og innkrevjing av skatte- og avgiftskrav, skattebetalingslova (heretter sktbl.) og skattebetalingsforskrifta (heretter sktbf.) tok til å gjelde 1. januar 2008. Frå same tidspunktet vart alle føresegner om avgiftsbetaling, renter, innkrevjing m.v. overført til dette lovverket. Det er på denne bakgrunnen vist til relevante føresegner i dette regelverket i direktoratet sine kommentarar.
I skattebetalingslova er fire rentetypar heimla; forseinkingsrente jf. skbtl. § 11-1, etterrekningsrente jf. skbtl.§ 11-2, rente ved forseinka tilbakebetaling jf. skbtl.§ 11-3 og tilbakebetalingsrente jf. skbtl.§ 11-4.
Renter ved forseinka betaling etter skbtl .§ 11-1 skal reknast av krav som ikkje blir betalte innan forfall, og rentene går fram til betalinga skjer. Etterrekningsrente i tråd med § 11-2 i lova skal også inngå i rekninga av forseinkingsrente, når eit hovudbeløp og renter ikkje blir betalte innan den fastsette fristen.
Renter av auke ved vedtak om endring/eigenretting (etterrekningsrente) etter skbtl.§ 11-2 skal utreknast av auke i avgift som blir fastsett ved vedtak om endring mm. Rentene går frå det tidspunktet krava opphavleg skulle ha vore betalte og fram til det blir treft vedtak om auke. Renteutrekning etter § 11-2 skjer når ei tidlegare fastsetjing blir korrigert, anten etter initiativ frå den toll- eller avgiftspliktige eller Tollvesenet. Det same er høve når det ikkje er skjedd ein tidlegare fastsetjing, men det skjer ein endring i avgiftsplikta.
Ved tilbakebetaling av for mykje betalt avgift etter forfallsfristen, skal det etter skbtl.§ 11-3 ytast rentegodtgjersle frå dette forfallet og fram til tilbakebetalinga skjer.
Ved tilbakebetaling av for mykje betalt avgift som følgje av vedtak om endring mm. etter skbtl. § 11-4, skal det ytast rentegodtgjersle frå betalinga fann stad fram til forfall.
Ordinære refusjonar etter søknad inneber at eit nytt faktum er oppstått. I slike tilfelle blir det som hovudregel ikkje gjeve rentegodtgjersle.
Satsane for dei ulike renteføresegnene blir regulerte av skbtl.§ 11-6. Satsar knytta til forsinka betaling og tilbakebetaling følgjer av forsinkelsesrentesatsen som vurderast kvart år. Andre satsar regulerast årlig med bakgrunn i styringsrenta. Gjeldande rentesatser finnes på Tollvesenets internettsider.
Det er fastsett beløpsgrenser for betaling og tilbakebetaling av krav. Beløpsgrensene gjeld pr krav eller pr termin, avgiftsspesifikasjon eller deklarasjon. Hovudregelen er at toll og avgift under 100 kroner ikkje skal betalast eller tilbakebetalast. Forseinkingsrenter har ei beløpsgrense på 50 kroner.
Ved innbetaling hos bank/poststad (skrankegiro) må kvitteringa ha datert påskrift/stempel som stadfester at avgifta er betalt (motteke til avrekning vert ikkje godteke).
Dersom betalinga er gjort i ei av kassene til Tollvesenet, må kassakvitteringa visast fram.
Ved betaling av avgifter for fleire køyretøy samstundes, kan ”Skjema til bruk ved samlebetaling” nyttast (skjemaet kan ein få på trafikkstasjonen eller ved regiontollstaden). Dersom KID og sum beløp er identisk på skjemaet og kvitteringa, er det tilstrekkeleg at kjennemerke eller understellsnummer går fram av skjemaet.
Elektroniske innbetalingar
Kvittering frå bank ved elektronisk innbetaling må ha kvitteringsstripe/oblat eller påskrift/stempel frå banken. Kvittering frå kunden sin eigen PC som inneheld KID, beløp, betalt dato, kontonummeret til kunden og Tollvesenets kontonummer kan leggjast fram for trafikkstasjonen som søker å kontrollere at KID på kvitteringa er identisk med KID på kravet.
Føresegna om fritak i Stortingets vedtak som gjeld omregistrering mellom ektemakar, gjeld òg partnarar som er registrerte etter lov om partnarskap av 30. april 1993 nr. 40 som gjeld frå 1. august 1993 (oppheva) og Lov om ekteskap av 4. juli 1991 nr. 47.
Det skal betalast avgift ved omregistrering av køyretøy mellom sambuarar. Sambuarar kan eventuelt registrere køyretøyet på begge personar. Sjå også punkt 19.
Omregistrering som går føre seg mellom foreldre og barn, eller omvendt, som arv, er friteke for avgift. Fritaket krev at det vert sett i verk fullt arveskifte (dødsbu), og at vedkomande er arving etter reglane i arvelova. Det kan krevjast at dokumentasjon for dette vert framlagt.
Køyretøy som er gjeve som forskot på arv eller arv etter testament som ikkje gjeld livsarving, er ikkje friteke for avgift ved omregistrering på mottakaren.
Det skal ikkje betalast avgift for køyretøy som er 30 år eller eldre. Datoen då køyretøyet vart registrert for første gong i Noreg skal leggjast til grunn her, jf. punkt 3. Fritaket vil for 2010 gjelde køyretøy med registreringsår 1980 og eldre.
Registreringsåret kan fråvikast om ein kan dokumentere at køyretøyet har produksjonsår tidlegare enn registreringsåret. Dette kan vere tilfelle der eit bruktimportert køyretøy ikkje har vore registrert i utlandet før det vart importert til Noreg.
Føresegna om fritak i Stortingets vedtak som gjeld utlodda køyretøy, gjeld ikkje køyretøy som vert brukte til å demonstrere gevinsten, men gjeld berre sjølve gevinsten.
Sjå Stortingets vedtak § 2 bokstav h
I avtale 23. oktober 1998 mellom Danmark, Finland, Island, Noreg og Sverige om Den nordiske investeringsbanken, går det fram av art. 9 at Den nordiske investeringsbanken og banken sine inntekter, aktiva og eigedom skal vere friteke for all skattlegging, med dei presiseringar som går fram av føresegna.
Fritaket skal berre gjelde avgift knytt til innkjøp som er nødvendige for banken si offisielle verksemd, jf. art. 9, fjerde leddet i avtalen.
Køyretøy som har vore registrert på tidlegare eigar i inntil 2 månader og innanfor denne fristen vert omregistrert på ny eigar, er friteke for avgift. Fristen skal reknast ut på grunnlag av den samla tida køyretøyet har vore registrert/påskilta på den tidlegare eigaren.
For køyretøy som vert avregistrert (avskilta) innanfor fristen, skal berre dei dagane køyretøyet har vore registrert på eigaren med kjennemerka på teljast. Fristen skal i desse tilfella reknast som 60 dagar. Vilkåret for avgiftsfritak har falle bort dersom registrerings-/påskiltingstida før og etter ein avregistreringsperiode (avskiltingsperiode) til saman vert over 60 dagar.
Fristen på 2 månader/60 dagar er absolutt, og gir ikkje rom for skjønsvurdering.
Ved omregistrering på ny eigar skal den registrerte datoen i motorvognregisteret leggjast til grunn. I dei tilfella der det ikkje er føreteke registrering, men naudsynte dokument er komne inn til trafikkstasjonen, kan det også gjevast avgiftsfritak. I desse tilfella er det krav om ei skriftleg stadfesting frå trafikkstasjonen. Som naudsynte dokument reknast mellom anna gyldig salsmelding, og ei melding frå forsikringsselskap om at det er teikna trafikkansvarsforsikring. Det er ein føresetnad at alle dokumenta lyder på same namn som køyretøyet skal registrerast på.
Avgiftsvedtaket § 2 bokstav j gir fritak for omregistreringsavgift ved heving av kjøp etter føresegnene i kjøpslova. Forskrifta § 6 nr. 8 og 9 utdjupar dette fritaket då det gjeld heving av førstegongs registrerte køyretøy eller tidlegare registrerte køyretøy.
Forskrifta § 6 nr. 8 rettar seg mot seljar av eit køyretøy som ikkje tidlegare har vore registrert i landet og som ein følgje av salet vert førstegongs registrert i Noreg på kjøpar. Ved heving av kjøp i slike tilfelle kan seljaren søkje om fritak for omregistreringsavgift idet køyretøyet vert registrert på seljaren igjen.
Forskrifta § 6 nr. 9 rettar seg mot kjøpar av eit tidlegare registrert køyretøy. Dersom kjøpet vert heva, kan kjøparen søkje om refusjon av betalt omregistreringsavgift på visse vilkår som er nemnt i føresegna.
Begge føresegnene gjeld berre ei side av kjøpshevinga og berre ei omregistrering, og det inneber at ved vidaresal av køyretøyet gjeld utgangspunktet om at det skal betalast omregistreringsavgift med mindre registreringa er friteken i medhald av andre fritaksføresegner.
Det skal ikkje betalast avgift ved fusjon mellom aksjeselskap. Grunngjevinga for fritaket er at det fusjonerte selskapet vert rekna som ei vidareføring av både det overdragande og det overtakande selskapet.
Med aksjeselskap meiner ein her selskap som vert omfatta av aksjelova § 1-1, og det er berre fusjon som følgjer aksjelova kapittel 13 som er friteke. Fritaket gjeld ikkje fusjon mellom andre selskapsformer.
For å oppnå fritak må det overtakande selskapet leggje fram dokumentasjon frå Føretaksregisteret (t.d. i form av slettemelding av det overdragande selskapet) for ein av trafikkstasjonane til Statens vegvesen. Denne skal syne at det er sett i verk fusjon mellom dei aktuelle selskapa.
Fritaket gjeld ikkje delingar av aksjeselskap slik som fisjonar eller ”fisjons-fusjonar”. I slike høve kan ikkje dei same omsyna som er nemnt over gjere seg gjeldande, då begge desse organisasjonsformene tek utgangspunkt i ei oppsplitting og ikkje ei vidareføring av dei opphavlege eigarformene og eigedelane.
I forskrifta om omregistreringsavgift § 6 nr. 11 er det gjeve uttømmande føresegner om kva slags tilfelle som fører til fritak ved omdanning av verksemder. Det vil t.d. ikkje verte gjeve fritak ved omregistrering frå enkeltmannsføretak til privatperson eller omvendt. Heller ikkje ved fisjon av aksjeselskap.
Det er den formelle eigaren som er registrert i motorvognregisteret som vert lagt til grunn ved vurderinga av om eigar er identisk. Privatperson og enkeltpersonsføretak vert ikkje identifisert med kvarandre, sjølv om eigar reelt sett er identisk. Det er difor vesentleg om køyretøya er registrert på personnummer eller organisasjonsnummer.
Søknad om fritak må sendast til Tollregion Oslo og Akershus, postboks 8122 Dep., 0032 Oslo. Naudsynt dokumentasjon må leggjast ved.
Ved reine opprettingar av feilregistreringar i motorvognregisteret skal det ikkje svarast avgift. Det inneber til dømes at dersom eit køyretøy ved ein feil ikkje er registrert i tråd med vegmyndigheitene sine reglar for registrering, vil dette kunne rettast opp utan avgiftsmessige følgjer.
Det same gjeld feilregistreringar som skuldast registreringsmyndigheita eller forhold som ligg innanfor Tollvesenets ansvarsområde og kontroll.
Føresegna om fritak i Stortingets vedtak om sletting av registrert eigar eller medeigar i motorvognregisteret, gjeld berre ved sletting, ikkje ved registrering av ny eigar/medeigar.
Registrering av ein ny medeigar er ikkje omfatta av fritaket og medfører derfor avgift.
Til dømes når det er registrert både ein medeigar og ein eigar inneber det at eigaren kan slettast og medeigaren flyttast til hovudeigar utan at det vert betalt avgift. Dette vert ikkje rekna som å registrere ny eigar, da medeigaren allereie er registrert.
Køyretøy registrert til bruk på Svalbard er fritekne for avgift ved omregistrering på ny eigar til framleis bruk på Svalbard.
Slikt køyretøy kan òg avgiftsfritt omregistrerast til leasing-selskap med adresse på fastlandet, dersom køyretøyet framleis er i bruk på Svalbard. Det skal då gjerast merknad i motorvognregisteret om at køyretøyet går på Svalbard.
Tollregionen kan etter søknad frita for avgiftsplikta. Føresegna set to vilkår som begge må vere oppfylte, og dispensasjonsfullmakta er som ei følgje av desse snever. I samhøve med forarbeid og praksis vert det i avgrensa grad lagt vekt på økonomiske, sosiale, helsemessige eller liknande forhold.
|